Yuna's Tulip: Believe In Me - Chapter 4

CHAPTER 4

WALANG salitang namagitan kina Yuna at Jerricko habang sabay na naglalakad pauwi sa bahay niya. Ilang beses nang pinakiusapan ni Yuna si Jerricko na huwag na siyang ihatid at abalahin pa ang sarili nito sa paghatid sa kanya. Pero sadyang makulit talaga ito. Hindi niya alam kung ano ang gagawin para lang paalisin na ito. Of course, she didn't want to be rude to him who dedicated his time just to escort her home.

Pambihira naman kasi si Mirui. Kailangan ba talaga nitong pakiusapan si Jerricko na bantayan siya kahit sabihin pang pumayag din si Lexus? Kung minsan talaga, hirap siyang sakyan ang iniisip ng kaibigan niyang iyon.

"Alam mo, mapapanisan ka ng laway sa pagiging tahimik mo. I'm still here. Nag-e-exist ako rito sa tabi mo, baka nagkakalimutan tayo," ani Jerricko na bumasag sa kanina pa nakakabinging katahimikan sa pagitan nila.

Kahit ayaw niya ay napangiti siya. Nag-iwas siya ng tingin at kinagat ang mga labi para lang hindi matawa.

Guia's Lotus: Be With Me - Chapter 11 (Final)

HINDI sigurado si Guia kung tama ba ang naisip niyang gawin nang mga sandaling iyon. Pero may isang bagay siyang gustong gawin, gustong patunayan para sa sarili niya. Kahit alam niyang masakit, kahit alam niyang sobra-sobra siyang mahihirapan, gusto pa rin niyang subukan.

Humugot muna siya ng pagkalalim-lalim na hininga. Iyon bang klase ng paghinga ng malalim na parang hindi na niya gagawin iyon sa susunod niyang buhay. Pero kailangan niyang kunin ang lahat ng lakas na meron siya sa katawan at ilabas iyon. Kailangan niya iyon para magawa ng maayos ang dapat na gawin sa huling stage na pagsasayawan niya.

Yes. After a long time, Guia was going to find out if all her efforts--with Lexus' help to bring it all out from her--was going to pay off. At gagawin niya iyon sa stage na ilang taon nang nagsilbing multo para sa kanya.

Sa stage ng auditorium.

Guia's Lotus: Be With Me - Chapter 10

KAHIT hindi pa rin magawang kalmahin ni Guia ang sarili ay pinilit pa rin niyang lakasan ang loob para makarating sa closed court. Hindi na talaga niya matatagalan ang patuloy na pag-iwas sa kanya ni Lexus sa kanya. Ayaw na niyang patuloy na bigyan ng palaiaipan ang sarili kung ano ba ang maling nagawa para gawin nito iyon sa kanya.

Tinimbrehan siya ni Mirui sa oras ng pagdating ni Lexus sa closed court. Ayaw niyang makakuha ng atensyon ng mga ka-teammate ng binata sa gagawing pagkumpronta rito. Kaya sinabihan niya si Mirui na siguraduhin nito na wala ang ibang Falcon Knights sa closed.court. At ayon sa kasamahan, mag-isa lang ito sa locker room nang mga sandaling iyon.

Ngayon nga ay naroon na siya sa pinto ng locker room. Humugot muna siya ng malalim na hininga bago kumatok ng ilang beses. Unti-unting bumibilis ang tibok ng puso niya habang hinihintay na bumukas ang pintong iyon, kung may magbubukas man. Hindi naman siya nabigo.

Bumukas ang pinto at pareho pa silang natigilan ni Lexus nang magtama ang kanilang mga mata. Bumahid din ang pagkagulat sa mukha ni Lexus pagkakita sa kanya.

Guia's Lotus: Be With Me - Chapter 9

IT DIDN’T happen at night. But the feeling it gave to Lexus was almost like he had been on a romantic date. Oo, ganoon ang nararamdaman niya nang makasayaw niya si Guia sa paboritong pavilion ng kanyang ina. It was a replica of Sierra Asahiro’s dance pavilion when she was a teenager. At habang lumalaki sina Lexus at Mirui ay isa iyon sa pinagtatambayan nilang magkapatid, lalo na kapag gusto nilang makapag-isip-isip nang maayos.

Pero nang araw na iyon, ginamit niya ang lugar na iyon upang magawa nilang dalawa ni Guia ang isang bagay na matagal na nitong hindi ginagawa—ang sumayaw. Totoo ang sinabi niya sa dalaga na ang talagang plano niya ay panoorin itong sumayaw nang solo sa unang pagkakataon sa lugar na iyon. Pero nagbago ang kanyang isip nang makasama’t madala na niya ito sa lugar. There and then, the idea of dancing with Guia on his mother’s most special place hit him.

At hindi niya pinagsisisihang sinunod niya ang kagustuhang makasayaw si Guia, lalo na sa lugar na iyon. All he did was to enjoy that wonderful moment he held her close to him like that. And with a beautiful smile in her face, at that. Weird mang isipin pero ninais niyang makita ang ngiti nitong iyon na para sa kanya. Hindi naman kasi niya alam kung para saan ang ngiting nakita niya kay Guia habang kasayaw ito.

Sa totoo lang, kahit masasabing may charms siya para mahulog ang loob ng mga babae sa kanya, hindi pa rin niya mapigilang ma-insecure kapag si Guia ang involved. Lagi siyang nawawalan ng kumpiyansa sa sarili kapag ang dalaga na ang kaharap niya. Isang dahilan marahil ay ang tunay niyang pagkatao na ilang taon na rin niyang inililihim sa lahat, maging sa mga kaibigan niya.

Guia's Lotus: Be With Me - Chapter 8

GABI na at unti-unti nang naglalabasan sa kalangitan ang mga bituin pero hindi pa rin maisipan ni Guia ang umuwi. Naroon siya sa tagong bahagi ng park na madalas nilang puntahan ni Lexus kapag gusto nilang mag-usap nang masinsinan. Kanina pa siya naroon mula nang umalis siya sa school pagkatapos ng performance ng Theater Club. Hindi na siya sumama sa after-party dahil gusto muna niyang mapag-isa at nang makapag-isip-isip dahil sa mga nangyayari sa kanya sa mga sandaling iyon.

Iniwan muna niya sa clubhouse ang basket ng bulaklak dahil ayaw niyang iuwi iyon sa bahay. Baka mamaya ay kung ano pa ang masabi ng kanyang ina. Tutuksuhin lang siya niyon at sasabihan siya na himala at nagkaroon na siya ng pagkakataong mag-entertain ng lalaki pagkatapos ng nangyari sa kanila ni Jeric.

Yes, she finally acknowledged the fact that Lexus managed to penetrate in her life in ways she didn’t expect. At sa maikling panahon na magkasama sila, may mga bagay pa siyang hindi nalalaman tungkol dito. Hindi pa sapat ang katotohanang nalaman niya tungkol sa pagiging magkapatid nito at ni Mirui. Aaminin niya, ikinagulat niya iyon. Sino ba naman kasi ang mag-aakala na ganoon pala ang namamagitan kina Mirui at Lexus? 

Gusto niyang lubusang maintindihan ang sitwasyon. Pero malabo pa yatang mangyari iyon lalo na kung ganito namang nahihirapan siyang i-approach ang lalaking iyon. At kapag ito naman ang lumalapit sa kanya, hindi niya mahagilap ang sariling tinig at hindi siya makapag-isip kung ano ang dapat niyang sabihin.

Guia's Lotus: Be With Me - Chapter 7

INIS na napaungol si Guia nang tumunog ang cellphone niya. Sa pakiramdam niya, wala pang isang oras na nakuha niya ang tulog na kailangan ngunit mailap sa kanya. At sa pagkakaalala niya, hindi siya nag-set ng alarm para sa araw na iyon.

Tiningnan niya nang masama ang patuloy pa rin sa pagtunog na cellphone sa bedside table. Para bang tatahimik naman iyon kung gagawin nga niya iyon. Buwisit na bumuntong-hininga na lang siya para pakalmahin ang sarili. Kapagkuwan ay kinuha niya ang cellphone.

Pero ganoon na lang ang pagkunot ng noo ni Guia nang makita ang pangalan ni Lexus sa screen. Kasabay niyon ay nakita rin niya ang oras. Seven twenty-six ng umaga. Ano’ng klaseng sapi na naman ang pumasok sa lalaking ito at wagas kung mang-istorbo ng tulog ng may tulog?

Masasagot lang ang tanong niyang iyon kapag sinagot na niya ang makulit na pagtawag ng dakilang istorbo na ito. Muli siyang bumuntong-hininga at itinapat ang cellphone sa tainga.

Guia's Lotus: Be With Me - Chapter 6

HINDI na talaga alam ni Guia kung ano ang pinaka-shocking sa lahat ng mga nalaman niyang impormasyon nang araw na iyon. Kung 'yong malaman niya na magkapatid pala sa ina sina Mirui at Lexus, kapatid naman ni Lexus sa ama ang teammate nitong si Theron Heinz Monterossa, 'yong all this time ay nagawa nilag itago iyon sa madla, o malaman na marunong pala sa pagpipinta ang lalaking ito na kinakatakutan sa buong Alexandrite University. Pero puwede rin ba niyang ikonsidera na nakakagulat ang malaman na siya pa lang ang nakakaalam ng lahat ng ito dahil siya lang ang outsider na pinagkatiwalaan ni Lexus ng lahat ng iyon? Hindi na niya alam. Hindi na siya sigurado sa dapat isipin.

Naroon lang siya sa sala at pinapanood sina Lexus, Theron, Tita Sierra, at Tito Arthur na nag-uusap sa bakuran nang masinsinan. Kasama niya si Mirui na nagpaliwanag sa kanya ng lahat-lahat tungkol sa komplikadong kuwento ng buhay ni Lexus.

“Ang hirap din siguro sa inyo 'yon, 'no? 'Yong itago sa lahat ang tungkol sa pagiging magkapatid ninyo ni Lexus at ang pagiging Monterossa pala niya,” komento na lang ni Guia na hindi inaalis ang tingin kay Lexus sa bakuran.

“Sanayan lang 'yan. At saka hindi basta-basta ang mga adjustment na kailangan naming gawin. Lalo na kapag lalabas kami ng bahay na 'to. Tingnan mo naman, napagkamalan pa kami ni Kuya na mag-on. Eww lang.” At si Mirui, umakto pa talaga na parang nasusuka.

Guia's Lotus: Be With Me - Chapter 5

KAPAG ka-weird-uhang mga pangyayari ang pag-uusapan, ang isang masasabi ni Guia na kabilang doon ay ang madalas na pagpunta ni Lexus sa building ng College of Arts. Wala sigurong weird doon kung iisipin niya na si Mirui ang pinupuntahan nito roon dahil pareho sila ng dalaga ng kursong kinuha—Fine Arts. Pero naging weird lang ang mga pangyayari nang mapansin nila—hindi lang siya—na sa third floor ito tumatambay kada hapon at talagang hinihintay ang paglabas niya sa classroom para sabay raw silang umuwi nito. Nasa second floor naman ang classroom ni Mirui kung saan naroon ang ibang mga third year student.

May isang linggo na ring ganoon ang nakikita niyang sistema ni Lexus. Hindi talaga niya alam kung ano ang iisipin sa mga pinaggagagawa nito. Nang tanungin naman niya ito kung bakit nito ginagawa iyon, pamisteryoso lang ang ngiting iginagawad nito bilang tugon. Kulang na nga lang, umbagin niya ito, eh. Pero pinigilan niya ang sarili. Kung ano man ang dahilan ni Lexus kung bakit nito ginagawa iyon, hahayaan na lang niya na ito ang magsabi sa kanya. 

Kung kailan man nito gagawin iyon, hindi nga lang niya alam.

“Tahimik ka na naman,” untag ni Lexus sa kanya habang naglalakad sila paalis sa campus. 

Guia's Lotus: Be With Me - Chapter 4

KAHIT hindi sigurado si Guia kung totoo nga ba ang sinabi ni Mirui sa kanya nang araw na iyon, pinili na lang niyang huwag munang pagtuunan iyon ng pansin. Isa pa, hindi makakatulong sa concentration niya ang alalahanin pa iyon lalo pa’t patuloy pa rin siyang nag-aalala para kay Lexus. Mahigit isang linggo na itong hindi nakakapasok sa school dahil sa trangkaso nito na siya ang may kasalanan. Kahit sabihin pa ni Mirui na kagustuhan ni Lexus ang nangyari kaya walang dahilan para sisihin niya ang sarili.

Sa loob ng mga panahong hindi pumasok ang binata, wala siyang ibang ginawa kundi ang mag-practice ng piyesang patutugtugin niya sa musical play at magbasa ng mga nobelang hindi pa niya nababasa. Nakatulong naman iyon sa kanya na ibaling sa iba ang atensyon niya. At natutuwa siya roon.

Nang araw na iyon, hindi maintindihan ni Guia kung bakit hindi siya mapakali. Iba rin ang kabang buong araw niyang nararamdaman mula nang tumapak siya sa Alexandrite University. Ayaw niyang isiping may hindi magandang mangyayari kaya naman pinilit niya ang sariling mag-isip ng mga positibong bagay.

Isinukbit na niya sa balikat ang sling bag at lumabas na sa classroom nang masigurong wala nang masyadong maraming estudyanteng nasa labas. Subalit agad siyang napahinto nang may tumigil ilang hakbang lang ang layo sa kinatatayuan niya. Nang mag-angat siya ng tingin, napaismid siya at tiningnan nang masama ang taong iyon.

Guia's Lotus: Be With Me - Chapter 3

IPINIKIT ni Guia ang kanyang mga mata nang maramdaman niya ang pagluluha niyon. Mukhang napagod na nang husto iyon dahil ilang oras na rin kasi siyang nagbabasa. Naroon siya sa ilalim ng malaking puno ng acacia sa open field sa campus ground dahil doon niya naisipang tumambay pagkatapos ng klase. Wala silang professor para sa huling klase niya kaya naman maaga silang pinauwi. Wala rin itong iniwan na activity sa kanila kaya naman ang mga kaklase niya, hayun at masaya. 

Pero siya, wala lang. Nanatili lang neutral sa lahat. Ang mahalaga lang naman sa kanya sa mga sandaling iyon ay maayos na niya ang magiging performance para sa musical play. Hindi niya alam kung bakit mas matindi yata ang dedication niya para lang sa performance na iyon. Hindi niya puwedeng irason na ginagawa niya iyon para kay Aria. May mas malaking rason para roon. Kaya lang, hindi naman niya matukoy kung ano.

Para bang... ginagawa niya iyon para makuha ang atensyon ng isang tao. Pero sino?

Hanggang dumating siya sa puntong hindi na niya magawang i-focus ang utak sa musical piece. Kaya ang naging diversion niya sa paparating na frustration, ang magbasa ng nobela. Mabuti na lang pala at dala niya ang ilan sa mga nobelang hindi pa niya natatapos basahin. Iyon na muna ang pinagtuunan niya ng pansin. Pero ninais naman niyang maghanap ng ibang lugar para gawin ang pagbabasa. Agad namang nagsialisan ang mga estudyante sa hallway dahil nagmamadali ang mga ito na umuwi upang makapaglakwatsa sa kung saan. Hindi naman siya nahirapang maghanap ng lugar na puwede niyang pagtambayan upang makapagbasa siya ng tahimik—na walang iba kundi ang malaking puno ng acacia. 

Guia's Lotus: Be With Me - Chapter 2

HINDI gustong mapag-isa ni Guia sa clubhouse ng Imperial Flowers pero hindi naman niya puwedeng pigilan ang mga kasamahan na umuwi nang maaga. May sari-sariling pagkakaabalahan ang mga ito nang araw na iyon at batid niya na importante ang mga iyon para sa mga ito. Palibhasa siya, ayaw pang umuwi sa bahay dahil nasa trabaho pa rin ang kanyang ina. Ito kasi ang kasalukuyang namamahala sa grocery na iniwan ng kanyang ama bago ito namatay.

Idagdag pa na wala siyang pagkakaabalahan doon kahit sabihin pang umuwi siya kaagad kasabay ng mga kasama niya. Kaya naisipan na lang niyang tumambay muna sa clubhouse. Isang malalim na buntong-hininga ang pinakawalan niya matapos patugtugin ang piyesang nakatoka sa kanya para sa musical play. Napapansin niya na ilang araw na niyang nakakahiligang gawin iyon.

To be specific, he was doing that ever since Lexus asked her when she last danced. Parang ibinuhos niya sa ilang beses na pagbuntong-hininga ang pilit na pinipigilang pag-iyak noong araw na itinanong sa kanya iyon ni Lexus.

“Grabe talaga ang babaeng iyon. Ang sabi ko, hintayin ako at sabay kaming uuwi. Mukhang plano pa akong indiyanin, ah.”

Guia's Lotus: Be With Me - Chapter 1

HINDI mapigilan ni Guia ang mapangiti habang pinapanood si Mirui sa tila inspirado na pagpapatugtog nito ng violin. Isa ito sa mga kasamahan niya sa subgroup ng Spiritual Garden Society ng Alexandrite University, ang Imperial Flowers. Sa katunayan, siya mismo ang personal na nag-recruit rito noong first year pa lang ito habang siya naman ay bagong hirang na leader ng grupo. 

Kinabibilangan ng labing-dalawang babae ang Imperial Flowers at tatlong taon na siyang leader niyon. At sa loob ng tatlong taon, nakita niya kung paano nahasa ang talento ni Mirui sa tulong na rin ng kanilang grupo. Gaya na rin ng naging pagtulong ng grupong iyon na mahasa ang talento niya at magawa niyang maipakita iyon sa madla.

“Iba nga naman ang nagagawa ng pag-ibig, 'no?”

Napalingon si Guia sa pinagmulan ng tinig na iyon. Sinalubong niya ng ngiti ang papalapit na si Ria, ang secondary leader ng Imperial Flowers. Naupo ito sa kanyang tabi at pinagmasdan din ang inspiradong pagpapatugtog ni Mirui.

Guia's Lotus: Be With Me - Story Description

Story of Guia Krystelle Medrano and Lexus Willard del Fierro

ーーーーーー

Para kay Guia, karugtong ng buhay niya ang pagsasayaw. Kaya naman ganoon siya kalungkot at tila tinanggalan na ng pagkakataong maging masaya nang maaksidente siya. Naging dahilan iyon upang tumigil siya sa pagsasayaw kahit masakit sa loob ng dalawang taon. Laking-pasalamat niya dahil wala si Lexus noong mga panahong naaksidente siya at tuluyang isinuko ang pagsasayaw. Ito ang huling taong gusto niyang maawa sa kanya dahil sa naging desisyon.

Ang hindi lang niya napaghandaan ay ang makulit na kagustuhan ni Lexus na bumalik siya pagsasayaw. Gagawin daw nito ang lahat upang balikan nito ang isang bagay na mahal niya. Kung alam lang nito, dahil sa sinabi nitong iyon ay may napatunayan siya sa tunay na damdamin niya rito.

Ang mali lang ni Guia, bago pa man niya magawang ipagtapat iyon sa binata ay bigla na lang siya nitong ipinagtabuyan sa buhay nito.