Tanging Pakiusap Ng Puso

Ako’y minsang nagmahal nang lubus-lubos.

Ngunit nang ako’y kanyang iwan, luha’y umagos.

Ako’y tulad sa kandilang itinulos

at sa pagkabigla’y ‘di na makakilos.

Ngayong ikaw ay dumating sa buhay ko,

hindi ko na malaman ang gagawin ko.

Hindi malaman ng pusong ito ang tungo nito.

Hindi matukoy kung tunay ang pag-ibig mo.

Ngunit nang ipinaramdam mo sa akin

ang pag-ibig mo, kahit hindi sabihin,

ako ngayon sa Diyos ay humihiling.

Sana’y tunay ang pag-ibig na dumating.

Ang tanging pakiusap ng aking puso,

tunay na pag-ibig ang kailangan ko.

Iyon ang ninanais kong ibigay mo

upang ang puso ko’y hindi na malito.

Ngunit kung ‘di mo man ako mamahalin,

ako sana’y maging kaibigan pa rin.

Kahit na ganito ang laan sa akin,

'di ko pagsisisihang ika’y dumating.

Ikaw Na Nga Kaya?

Ako'y humiling na sana'y masilayan

Ang isang taong magiging kaibigan

Taon ang itinagal ng paghihintay

Bago napakawalan ang aking lumbay

Labis ang kasiyahang nadarama ko

Sa tuwing tayo ay magkasama rito

Iba ang ngiting ipinapakita ko

Kapag ika'y nariyan lang sa tabi ko

Maging sa panaginip ay nakikita

Mukha mong sa ‘kin ay nagbibigay-saya

Matamis mong ngiti ay nakikita pa

Sa mga gabing ako'y matutulog na

Ang hiling ko lang sa mahal na Bathala

Aking masilayan ang itinadhana

Ngunit pa'no malalaman kung ikaw nga

Ikaw na nga kaya ang aking tadhana?

When It Rains, It Pours...

…pero sobra naman ‘to. Kailangan talagang sobra-sobra ang buhos nito sa amin? Ilang buwan na kaming talagang pinapahirapan ng mga ito, eh. Hindi ko na alam ang gagawin ko. Kahit magreklamo naman ako, wala naman akong magawa. Wala namang mangyayari, eh. Kumilos ka man, parang walang effect.

Bayad sa internet, sa bahay, sa ilaw at tubig… Normal case scenario na siguro ito sa amin since the day na talagang alam kong inuunti-unti na kaming iniiwan ng Papa ko sa ere. Iniiwan na rin niya sa amin lahat ng problemang binuo niya dahil sa pagiging hardheaded niya. Kaya ang resulta, hindi na ako makakapunta sa PHR workshop dahil kailangan nila ang perang meron sa akin na dapat sana ay gagamitin ko para sa registration fee at pamasahe ko papuntang QC. And then ito pa, ang MS ko. Returned ang resulta. Nakakawalang-gana. Parang hindi mo na talaga makita ang sarili mo na tinatahak ang gusto mo kasi nakakawala ng confidence ang lahat ng mga problemang dumarating.

Kaya kung minsan, hindi ko maiwasang kuwestiyunin kung ano pa ba ang use ng mga pinaggagagawa kong ito. Nakakainis!

Alaala Ng Isang Paalam

Isang gabi, ako’y tumingin sa buwan

At muling naalala ang isang nakaraan

Alaala ng isang pamamaalam

Na ‘di ko kailanman kayang kalimutan

Luha ang naging kapalit ng paalam

Sapagkat wala na itong kahihinatnan

Ang pag-ibig mo’y naging mapanlinlang

At hinayaan ang puso ko’y sugatan

Ang mukha mo’y lagi kong nasisilayan

Kahit na ninanais kong kalimutan

Ngiti mo ay hindi magawang lumisan

Sa puso kong sa iyo ay nagmamahal

Luha ko’y hindi ko magawang pigilan

Puso ko’y nadurog nang iyong iwanan

At hindi ko magagawang kalimutan

Hapding kaakibat ng iyong paglisan

Ito ang alaalang nais limutin

Ngunit ang panalangin ko’y ayaw dinggin

Hanggang kailan ako paluluhain

Ng pag-ibig mong ‘di na laan sa akin?

Paano Kita Mamahalin?

Minsan ako'y nagtanong

Kahit hindi masagot

'Pagkat ang puso'y lito

At hindi sigurado

Paano ba magmahal

Kung ika'y nahihiya?

Pa'no ba ipakita

Tunay na nadarama?

Takot ang nagkukubli

Kaya hindi masabi

At takot na iwaksi

Pag-ibig sa 'sang tabi

Pa'no ka mamahalin

Kung lumayo kang pilit?

Tunay ba ang pag-ibig

Na alay mo sa akin?

Sa Pagsapit Ng Gabi

Sa paglubog ng araw

Ako'y nagpapaalam

Sapagkat isang araw

Ang nagdaan na naman

Sa pagsapit ng dilim

Nakita ang bituin

Lahat ay nagniningning

At ako'y napatingin

Ngunit hindi ang buwan

Ang nais masilayan

Sapagkat sa isipan

Laman ay alaala

Mga panaginip ko

Ikaw ang laman nito

Alaala'y narito

Bahagi ng puso ko

Manatili Ka Lang

Nang ika'y makilala

Nabuhay ang pag-asa

Pag-ibig ay nadama

Takot lang ipakita

Ngunit ako'y binigyan

Isang damdaming tunay

Tapat na nasilayan

Pag-ibig na hinintay

Subalit ang pangamba

Pa'no kung lumisan ka?

Makakaya ko nga ba

Kung ika'y mawala na

Kaya ako'y nagdasal

Upang Kanyang pakinggan

Ang aking kahilingan

Manatili ka lamang

Sa Pagpatak Ng Ulan

Ako ay napatingin

Sa bituing maningning

Nadama ko ang hangin

Na umihip sa akin

Pumapatak ang ulan

Luha ko'y sumasabay

Ako ay namaalam

At lumbay ay hinagkan

Ako ay nagdurusa

At aking naalala

Pag-ibig na sininta

Ngayon ay naglaho na

Ang ula'y pumapatak

Nakadama ng habag

Hindi nga ba mapalad

Puso kong laging salat?

Sa Araw Ng Puso

Hindi ko iniisip

Ni hindi ko masambit

Sumalit sumisingit

Maging sa panaginip

Sa araw na magdaan

Ika'y nasisilayan

Ngunit 'di malapitan

Pangamba'y nangunguna

Pilit ko mang ikubli

Sa pusong nangingimi

'Di ko maililihim

Kahit na ano'ng gawin

At sa araw ng puso

Sana ay malaman mo

Hiling ko lang sa iyo

Sana'y maramdaman mo

Ang Alay Sa Tadhana

Nagsimula ang araw

Na humiling sa Kanya

Nagdasal na makita

Ang s'yang itinadhana

Ang ibon ay umawit

Ang bitui'y nagningning

Umigting ang damdamin

Ano'ng ibig sabihin?

Nakita ko na siya

Ang s'yang itinadhana

Subalit may pangamba

Puso ko ay may kaba

Kung s'ya ang tadhana ko

Sana nga'y malaman ko

Ito'y isinulat ko

At aking alay sa iyo